ХАЛҚАРО АСТРОНОМИЯ ИТТИФОҚИ — Халқаро илмий жамият. Жаҳондаги астрономик муассасалар, расадхоналар, интларнинг ҳаракати билан 1919 й. ташкил этилган. Унга 70 давлат аъзо. Ўзбекистон 1998 й. дан аъзо. Асосий вазифалари: астрономиянинг барча соҳаларини ривожлантиришга ёрдам кўрсатиш; астрономик тадқиқотларда илмий ҳамкорликни йўлга қўйиш; астрономия фани манфаатларини бошқа халқаро ташкилотларда ҳимоя қилиш. Халқаро астрономия иттифоқи иш органлари ижроия қўмитаси ва астрономиянинг алоҳида муаммолари билан шуғулланувчи 37 та қўмитасидан иборат 7 та бўлимни ўз ичига олади. Қўмиталари, асосан, халқаро конференция, симпозиум ва б. ни ташкил қилиш йўли билан мувофиқлаштириш ишларини олиб боради. Умумий ишни Халқаро астрономия иттифоқи Бош ассамблеяси бошқаради; у ҳар 3 йилда бир марта йиғилади. Бош ассамблея умумий йиғилиш ва мажлисларида астрономиянинг энг долзарб масалалари тўғрисидаги маърузалар тингланади, астрономик кузатишлар ҳисоботлари тасдикданади ва янги тадқиқотлар дастурлари таклиф килинади.