ХАСКАШ — хашак, хасчўп ва б. ни йиғиш, тўплаш ёки уруғи сочиб экиладиган ўсимликлар (арпа, буғдой, укроп, кашнич ва б.)ни экишга мўлжаллаб ҳайдалган ёки чопилган ер тупроғини майдалаб текислаш учун ишлатиладиган қ. х. ва уйрўзғор қуроли. Уйрўзғорда ишлатиладиган Хаскашнинг узун дастаси ёғочдан, кўп тишли танаси тобланган пишиқ металлдан ясалади. Қ. х. да ишлатиладиган Хаскашнинг тракторга тиркаб ёки осиб ишлатиладиган хиллари бўлади. Бундай X. ўрилган ўсимлик (беда, ўт ва б.) пояларини уюм қилиб тўплаш, қуритиш учун ағдариб туриш, боғбоғ қилиб боғлашга тайёрлашда ишлатилади.