ХАТНА ТЎЙИ — ўзбеклар ва б. бир қанча мусулмон халқлардаги хатна маросими. Ислом дини тарқалгандан сўнг суннат амали бажарилишини байрам қилиш сифатида одат тусига кириб қарор топган. Хатна тўйи ўғил болалар «қўлини ҳалоллаш»нинг, яъни уларни чин мусулмонлар қаторига ўтказишнинг асосий шарти ҳисобланган. Тўйга тайёргарлик (мас, маслаҳат оши), меҳмонларни таклиф қилиш, меҳмонлар шарафига ўйинкулги, томошалар уюштириб зиёфат ўтказиш Хатна тўйининг таркибий қисми ҳисобланган.