ХЎЖАЕВЛАР

ХЎЖАЕВЛАР — ўзбек цирк артистлари сулоласи. Замонавий ўзбек циркида чавандозлик ва от ургатиш жанри ривожига катта ҳисса қўшишган. Сулола асосчиси — Хўжаев Муҳаммад (тахаллуси «Чаққон») (1886, Қўқон — 1971. 28.2, Тошкент) — Ўзбекистон халқ артисти (1939). Ижодий фаолиятини 8 ёшидан Баратбой раҳбарлигидаги цирк гуруҳида бошлаб, муаллакчилик, ҳаво гимнастикаси ва масхарабозлик уйинларида иштирок этган. 1900 й. дан наманганлик Мирзааҳмад циркида муаллақчи Қодир Абдуллаев билан ишлаган, 1905 й. дан Муллабой Мансуров циркида фаолиятини давом эттириб, қизиқчилар ва муаллақчилар гуруҳларида қатнашган, турникда, бир погонали ва икки погонали чиғириқда ишлаган. 1919—20 йлар Р. Абдухалилов ва Ф. Юпатов циркларида ишлаган. 1931 й. «Эркинликдаги отлар» томошасини тайёрлаб, ўзбек цирки тарихида энг кучли от ўйинларидан бирини яратиб, кўп йиллар давомида намойиш этди. Хужаева Лола (1923.18.9, Самарканд) — чавандоз, ит ўргатувчи. Муҳаммад Хўжаевнинг қизи. Ўзбекистон халқ артисти (1950). 1931 й. дан отаси раҳбарлигидаги «От устида вольтиж» ҳамда «Чавандозлик» уйинларида, шунингдек, акробатлар гуруҳида қатнашган. 1934 й. «От устида гротеск» томошасини яратиб, унда миллий ўзбек рақси пластикасини анъанавий чавандозлик трюклари билан узвий боғлади. Чопаётган от устида бир неча мураккаб уйинларни енгил ва эпчил ижро этар эди, масалан, баландга сакраб, тиззага ўтириш, сўзаналар устидан сакраб ўтиш, отни тортилган тасмалар устидан сакратиш ва б. Л. Х. бажарган бетакрор машклардан бири — чопаётган отни кенг тасма устидан сакратиб, Узи ҳам баландлиқдаги тасмадан сакраган ва яна от устига қайтиб тик турган. 1972 й. дан ит ўргатувчи.

---

Кирилл алифбосида мақола: ХЎЖАЕВЛАР ҳақида тўлиқ маълумот категорияси: X ҳарфи фикрингиз бўлса изоҳда қолдиринг ва дўстларингиз билан улашинг биз бундан минатдор бўламиз бизни кузатишни давом этинг (у ким, бу нима, қанақа ?, тушунчаси деган саволарга жавоб топишингиз мумкин)