ЁНҒОҚДОШЛАР (Juglandaceae) ёпиқ уруғлилар тоифасига мансуб айри тожбаргли дарахтлар оиласи. Барглари йирик, тоқ патсимон, эфир мойли. Гуллари бир жинсли, чангчи гуллари кучаладан иборат. Уруғчи гуллари новда учида биттадан ёки бир нечтадан жойлашган. Гулқўрғони оддий, 4 баргчали. Уруғчи гули 2 мевабаргчали. Меваси ошловчи моддаларга бой қалин пўст билан ўралган. Мағзи буришган, йирик уруғпаллали. 50 га яқин тури бор. Осиёнинг шарқида ва Американинг тропик қисмларида кўп ўсади. Ўзбекистонда ёнғоқ туркумига мансуб 1 та тури ёввойи ҳолда ўсади. Мағзида 77% гача ёғ бор. Баргидан, мева пўстидан тўқ жигарранг бўёқ ва витаминлар олинади. Ёғочи мебель тайёрлашда ишлатилади.