ЮСУФ НАҚҚОШ (15-аср охири, Ҳирот — 16-аср 30-й. лари, Мовароуннаҳр) — мусаввир, Камолиддин Беҳзоднинг шогирди. Мовароуннаҳрда устозининг анъаналарини давом эттирган. Тарихчи Зайниддин Восифий мусаввирни «Мавлоно Жалолиддин Юсуф» деб зикр этади, уни «фазилат ва камолот мужассами, бадиий расмлар мусаввири, латиф рақамлар нафис ижодкори», «наққошлик ва суратгарлик санъатида камолот мартабасида эрди», деб таърифлайди. Юсуф наққош Келди Муҳаммад номи билан машҳур бўлган шайбонийлар вакили Абулмузаффар Султон Муҳаммад Баҳодир саройида хизмат қилган.