ЗОКОНИЙ Низомиддин Убайдулло (1270/1280 – Эрон – тахм. 1370) – форс ёзувчиси ва шоири, форс адабиётида ҳажв (сатира жанри) асосчиси. Закон ва Бағдоддаги билим масканларида таълим олган. Араб ва форс тилларида ижод қилган. Зоконийнинг «Наводир ул-амсол» («Нодир масаллар»), «Ахлоқ ул-ашроф» («Зодагонлар ахлоқи»), «Сад панд» («Юз насиҳат») каби асарлари форс адабиётининг нодир намуналари ҳисобланади. «Муш-у-гурба» («Мушук ила сичқон») кичик ҳажмли мажозий достони жаҳон халқларининг кўплаб тилларига, шунингдек, ўзбек тилига ҳам таржима қилиниб, 1907 —09 й. ларда бир неча бор чоп этилган.