Orolmirzo Safarov, Ozodbek Nazarbekov - Gar nolisak

[Monolog – Ozodbek Nazarbekov]
Zulmat, qorong`ulik, sukunat.
Bu jahon ichra bormanmi? Qo`rqib ketaman…
Oh, bu zimiston qa’rida titilib ketmasmi vujud?
Qaro sukunat bo`g`zida qonga belanmasmi vaqt?
Umrning zim-ziyo yo`llariga termulib, qaro sochlar oqarmasmi?
Najot bormi, bu tim qarolikda yorug`lik ilinji bormi?
Oh zulmat, ko`rinmas kaftlaring bilan ojizlarning ko`zini silab, ruhini allalaysan.
Nurga tashnalar ko`nglida esa chechaklar undirasan, qorong`ulikni ko`rishga, sukunatni tinglashga o`rgatasan.
Oh zulmat, og`ushingda yashayotgan odamning dilida bir kun uyg`onmasmi momoqaldiroq, bir kun so`zlari chaqmoqqa aylanmasmi?
Hayhot… Noxos ko`ngilning qorong`u osmonida yulduzlar charaqlay boshlaydi, qalb tunida oy nuri uxlab tushlar ko`radi,
dil shomida sevinchlar shudring bo`lib yog`iladi.
Tiyra sukunat parchalarida xokisor bandalarning yorug` munojoti aks-sado topadi.

[Orolmirzo Safarov]
Zulmat ichra o`tar mening tun-u kunim,
Men ham sizday ko`rgim kelar oy-quyoshni.
Lek taqdirdan nolimasdan yashayman jim,
Faryod solib, toshga urmam aziz boshni.

Lek taqdirdan nolimasdan yashayman jim,
Faryod solib, toshga urmam aziz boshni.
Shukur deyman – oyoq-qo`lim salomatdir,
Gar nolisam, bu Xudoga malomatdir.

[Ozodbek Nazarbekov]
Ming bor shukur, ko`kka yetar bo`ylarimiz,
Har kun to`yga ulanmoqda to`ylarimiz.
Tirik jonning rizqin berar qodir Xudo,
Elga tinchlik so`rar duogo`ylarimiz.

Ne`matlarning eng yaxshisi halovatdir,
Gar nolisak, bu Xudoga malomatdir.

[Ozodbek Nazarbekov va Orolmirzo Safarov]
Ne`matlarning eng yaxshisi halovatdir,
Gar nolisak, bu Xudoga malomatdir.

[Orolmirzo Safarov]
To`rt yonimda topganim – chin yor-u do`stlar,
Bilinmaydi uncha-muncha kamu ko`stlar.
Farzandlarim kulgusini eshitsam bas,
Hotirjamman, ko`rmasa ham mayli ko`zlar.

Qalbing bilan ko`rish ham bir karomatdir,
Gar nolisam, bu Xudoga malomatdir.

[Ozodbek Nazarbekov]
Kimga erta, kimgadir kech kelgay davron,
Kimlargadir shu kunlar ham bo`lgan armon.
Sinovlarga sabr qilmoq qanday go`zal,
Shunda o`zi qo`llar bizni buyuk Rahmon.

Shukur qilmoq mo`minlikdan dalolatdir,
Gar nolisak, bu Xudoga malomatdir.

[Ozodbek Nazarbekov va Orolmirzo Safarov]
Ne`matlarning eng yaxshisi halovatdir,
Gar nolisak, bu Xudoga malomatdir.
Tiriklikning o`zi ham zo`r mukofotdir,
Gar nolisak, bu Xudoga malomatdir.

Gar nolisak, bu Xudoga malomatdir…
O-ooy,
Tiriklikning o`zi ham zo`r mukofotdir…