Bahrom Mahmudzoda - Dadamni eslab

Mangu emas yulduz to'la osmon hatto, 
To'lib-toshib oqqan bahri ummon hatto, 
Kelib ketgay, shonu shuhrat, davron hatto, 
Manim ko'nglim dunyolarga o'chmas, dada. 
Xayolingiz xayolimdan o'chmas, dada. 
 
Necha-necha ayriliqqa ko'ngan yurak, 
Qancha dardni o'z bag'riga ko'mgan yurak, 
Bugun og'ir qayg'ularga cho'mgan yurak, 
Bittagina musibatga ko'nmas, dada, 
Haq deb yondim, endi ko'nglim so'nmas, dada. 
 
Gul ko'nglimdan taralguvchi gul sasim bor, 
Shu gullardan taralguvchi nafasim bor, 
Uzoq umr ko'rganlarga havasim bor, 
Sochingizdek orzularim oppoq, dada, 
Lekin dardim, ko'z yoshlarim ko'proq, dada. 
 
Sizdan rizo yashar o'g'il, qizingiz, oh, 
Аrmon bo'ldi eng oxirgi so'zingiz, oh, 
Tushlarim kirar yuzu ko'zingiz, oh, 
Haq rasulga qo'shni bo'lib yuring, dada, 
Ul yoqda ham duo qilib turing, dada. 
 
Oqlab yashash farz erur non-tuzingizni, 
Qaydan izlay ovozingiz-so'zingizni, 
Ko'rdim o'g'il, qizlarimda o'zingizni, 
Yuzu ko'zi sizga juda o'xshash, dada, 
Tilaklari faqat sizday yashash, dada. 
 
Yuragimni duo bilan to'ldir, Xudo, 
Dilda toza maqsadlarim mo'ldir, Xudo, 
Sen otamni jannatingda kuldir, Xudo, 
Qolganlarning umri uzoq bo'lsin, dada. 
Har bandaga iymon hamroh bo'lsin, dada.


Бахром Махмудзода - Дадамни эслаб

Мангу эмас юлдуз тўла осмон ҳатто, 
Тўлиб-тошиб оққан баҳри уммон ҳатто, 
Келиб кетгай, шону шуҳрат, даврон ҳатто, 
Маним кўнглим дунёларга ўчмас, дада. 
Хаёлингиз хаёлимдан ўчмас, дада. 
 
Неча-неча айрилиққа кўнган юрак, 
Қанча дардни ўз бағрига кўмган юрак, 
Бугун оғир қайғуларга чўмган юрак, 
Биттагина мусибатга кўнмас, дада, 
Ҳақ деб ёндим, энди кўнглим сўнмас, дада. 
 
Гул кўнглимдан таралгувчи гул сасим бор, 
Шу гуллардан таралгувчи нафасим бор, 
Узоқ умр кўрганларга ҳавасим бор, 
Сочингиздек орзуларим оппоқ, дада, 
Лекин дардим, кўз ёшларим кўпроқ, дада. 
 
Сиздан ризо яшар ўғил, қизингиз, оҳ, 
Армон бўлди энг охирги сўзингиз, оҳ, 
Тушларим кирар юзу кўзингиз, оҳ, 
Ҳақ расулга қўшни бўлиб юринг, дада, 
Ул ёқда ҳам дуо қилиб туринг, дада. 
 
Оқлаб яшаш фарз эрур нон-тузингизни, 
Қайдан излай овозингиз-сўзингизни, 
Кўрдим ўғил, қизларимда ўзингизни, 
Юзу кўзи сизга жуда ўхшаш, дада, 
Тилаклари фақат сиздай яшаш, дада. 
 
Юрагимни дуо билан тўлдир, Худо, 
Дилда тоза мақсадларим мўлдир, Худо, 
Сен отамни жаннатингда кулдир, Худо, 
Қолганларнинг умри узоқ бўлсин, дада. 
Ҳар бандага иймон ҳамроҳ бўлсин, дада.