BIRLAMCHI BOʻSHLIQLILAR, toʻgarak chuvalchanglar — umurtqasiz hayvonlar tipi (yoki kichik tipi), ularda terimuskul qopchigʻi bilan ichagi oraligi tananing birlamchi boʻshligʻini tashkil etadi (nomi shundan olingan). Qilchuvalchanglar, qorinkipriklilar, kolovratkalar, nematodalar, kinorinxalar kabi sinflarga boʻlinadi. Koʻpincha nematodalar va barcha akantotsefalar odam, hayvon va oʻsimliklarda parazitlik qiladi. Erkin Birlamchi boʻshliqlilar dengizlarda, chuchuk suvlarda, tikanboshlilar tuproqda yashaydi.