TOJIKISTON QOʻY ZOTI

TOJIKISTON QOʻY ZOTI — yarim dagʻal jun beradigan dumbali qoʻy zoti. 1947—64 y. lar davomida Tojikiston qishloq xoʻjaligi i. t. intining Daganakiyik eksperimental xoʻjaligida akad. Gʻ. A. Aliyev rahbarligida va qator chorvadorlar ishtirokida hisori sovliklarini saraji qoʻchqorlari bilan chatishtirish va olingan sarajihisori duragayi qoʻchqorlari bilan linkolnhisori duragayi sovliklarini chatishtirib chiqarilgan. Hisori qoʻyiga xos yiriklik, mustahkam konstitutsiya, erta yetiluvchanlik, yuqori goʻshtdorlikyogʻdorlik kabi qimmatli xoʻjalik belgilarini saqlab qolish bilan birgalikda, qoʻylarda jun mahsulotini oshirish va sifatini yaxshilash kabi qoʻshimcha koʻrsatkichlar ham oʻz ifodasini toptan. Qoʻchqorlarining tirik vazni 90—100 (baʼzan 140), sovliqlari 70—75 kg. Qoʻchqorlaridan 3,5—4,0, sovliklaridan 2,5—2,7 kg jun olinadi. Juni kokilsimon tuzilishga ega, sal toʻlqinsimon, yaltiroq, pishiqligi, qayishqoqligi va elastikligi bilan ajralib turadi. Kokillarining uzunligi qoʻchqorlarida 18 — 21, sovliqlarida 15—16 sm. 65— 72% toza jun chiqadi. Serpushtligi 100 ona qoʻydan 100—110 qoʻzi olinadi.

Bu zot qoʻylari, asosan, Tojikistonda va qisman Oʻzbekistonda koʻpaytirib boqiladi. Oʻzbekistonda mazkur zotdan dagʻal junli dumbali jaydari qoʻy zotlarini yaxshilash uchun foydalaniladi.

Ad.: Vorobyev P. A., i dr., Ovsevodstvo, kozovodstvo i texnologiya proizvodstva shersti i myasa, M., 1989; Vasilyev N. A. i dr., Ovsevodstvo i texnologiya proizvodstva shersti i baraninы, M., 1990.

Abdusattor Amirov.

---

Lotin alifbosida maqola: TOJIKISTON QOʻY ZOTI haqida to'liq ma'lumot kategoriyasi: T harfi fikringiz bo'lsa izohda qoldiring va do'stlaringiz bilan ulashing biz bundan minatdor bo'lamiz bizni kuzatishni davom eting (u kim, bu nima, qanaqa ?, tushunchasi, degan savolarga javob topishingiz mumkin)