XASKASH — xashak, xaschoʻp va b. ni yigʻish, toʻplash yoki urugʻi sochib ekiladigan oʻsimliklar (arpa, bugʻdoy, ukrop, kashnich va b.)ni ekishga moʻljallab haydalgan yoki chopilgan yer tuprogʻini maydalab tekislash uchun ishlatiladigan q. x. va uyroʻzgʻor quroli. Uyroʻzgʻorda ishlatiladigan Xaskashning uzun dastasi yogʻochdan, koʻp tishli tanasi toblangan pishiq metalldan yasaladi. Q. x. da ishlatiladigan Xaskashning traktorga tirkab yoki osib ishlatiladigan xillari boʻladi. Bunday X. oʻrilgan oʻsimlik (beda, oʻt va b.) poyalarini uyum qilib toʻplash, quritish uchun agʻdarib turish, bogʻbogʻ qilib bogʻlashga tayyorlashda ishlatiladi.