ERKAKOʻT — qoʻngʻirboshlilar oilasiga mansub koʻp yillik oʻtsimon oʻsimliklar turkumi; ozuqabop ekin. Yevrosiyo,Shim. Afrika, Avstraliya va Yangi Zelandiyada 15 turi tarqalgan. Oʻrta Osiyo, Kavkazda 10 ga yaqin turi oʻsadi. 4 turi: sibir E. i, choʻl E. i, taroqli Erkakoʻt vataroqsimon yoki keng boshoqli Erkakoʻt ekiladi. Boshoqlanish bosqichida 100 kg koʻk massasida 22,7 ozuqa birligi va 4,1 kg hazm boʻladigan protein, 100 kg pichanida 48,7 ozuqa birligi va 6,9 kg hazm boʻladigan protein bor. E. oʻsgan yaylovlarda mollar boqilgandan keyin ham oʻt qoplami qayta koʻkaradi. Sovuqqa va qurgʻoqchilikka chidamli. Barcha q. x. hayvonlari xush koʻrib yeydi.