КВАНТ ЭВОЛЮЦИЯ (лот. quantum – қанча) — йирик таксонлар (оила, туркум, синф ва б.)нинг шаклланишида эволюциянинг юқори изчиллигини тушунтирувчи концепция. К. э. концепциясини Америка палеонтологи Ж. Симпсон таклиф этган (1944). Квант эволюция жараёнида организмларнинг бошланғич гуруҳи ўзининг аввалги адаптив зонага мослашишини йўқотади; сўнгра тезда ноадаптив ҳолатни босиб ўтиб янги адаптив зонага мосланувчи комплекс белгиларни ҳосил қилади ёки нобуд бўлади. Квант эволюция концепциясига кўпчилик олимлар шубҳа билан қараб, организм яшаш жойининг оралиқ типларидан фойдаланиш орқали янги муҳитга аста-секин мослашганлигини тан олишади.