ХАЛҚ КУЙЛАРИНИ ҚАЙТА ИШЛАШ

ХАЛҚ КУЙЛАРИНИ ҚАЙТА ИШЛАШ — профессионал мусиқа — бастакорлик ва композиторлик ижодиёти соҳаси, муайян жанр. Кўп овозли мусика заминида аранжировка, гармониялашга. қисман яқин, лекин услубан бирмунча мураккаб. Композиторлик мактаблари шаклланишида Халқ куйларини қайта ишлаш муҳим аҳамиятга эга бўлиб, дастлабки босқич вазифасини бажаради, зеро миллий мусиқа услубларини ўзлаштиришда ижодий лаб. вазифасини ўтайди (Комитас, У. Ҳожибеков, 3. Палиашвили, М. Глинка, Э. Григ, Н. Лисенко, Б. Барток, Ж. Гершвин, С. Прокофьев, Л. Яначек ва б.).

Ўтмиш ўзбек мусиқа ижрочилиги ва ижодиёти ўзгарувчанлик, оғзакилик каби омилларга асосланган бўлиб, унда халқ ҳамда мумтоз чолғу куй ёки ашула йўлларининг вариантларини яратиш кенг урин олган. Мазкур анъанани бастакорлик ижодиётининг таркибий йўналишига айлантириб, Т. Жалилов, Ю. Ражабий ва б. ижодкорлар Халқ куйларини қайта ишлашнинг монодия заминидаги етук намуналарини яратишган.

Композиторлар ижодидан Халқ куйларини қайта ишлаш катта ўрин олиб, Ўзбекистонда мусиқали драма, опера, балет, симфоник мусика, кантата, оратория, камер мусиқа жанрлари ўзлаштирилишида муҳим омил бўлди. Бу соҳадаги дастлабки тажриба (19-а. охири — 20-а. бошларида Н. Кленовский, Ф. Лейсек, Н. Миронов, К. Абдуллаев, 3. Мақсудов ва б. яратган асар) ларда композиторлар ўзбек мусиқа мероси хусусиятларини сингдиришолмади. 1920—30 й. ларда В. Успенский бошка композиторлар каби халқ қўшиқлари («Заркокил», «Чаманда гул» ва б.), «Фархрд ва Ширин» мусиқали драмасида мураккаб ашула ҳамда мақом йўллари («Найларам», «Чоргоҳ» ва б.)ни тинтловчиларга мўлжаллаб қайта ишлашда куп овозли мусиқа воситалари (айниқса, гармония имкониятлари)дан чекланган ҳолда фойдаланган. Фақат 30-й. ларнинг 2-ярмида А. Козловский 4 та фаргонача («Танавор», «Ўзганча», «Фигон» ва «Гул юз узра») ашулани овоз ва симфоник оркестр учун қайта ишлаб, куп овозли мусиқа воситаларини кенг татбиқ этди (айниқса, «Танавор»да), бадиий етук натижаларга эришди. Г. Мушель 1941 й. «55 ўзбек халқ қўшиғи» тўпламини яратди. Халқ куйларини қайта ишлашда янги босқич 50-й. ларда М. Бурҳоновнит жўрсиз хорга мўлжалланган ўзбекча «Энди сандек», «Ганжи Қорабоғ», тожикча «Сари кўҳи баланд», уйғурча «Сайра», қорақалпоқча «Бибигул» каби қайта ишланган қўшиқлари билан бошланди. Уларда монодия ва кўп овозли мусика анъаналари узвий боғланган. Кейинги йилларда халқ куйларига асосланган журсиз хорлар Ик. Акбаров, С. Бобоев, Б. Умиджоновлар ижодида ривожланди. Б. Надеждин, Т. Содиқов, Б. Гиенко, М. Левиев, Д. Зокиров, С. Жалил ва б. композиторлар халқ куйларини турли ижрочи (якка соз, якха соз ва фортепиано, ансамбль ва оркестр) лар учун қайта ишлашган.

Ад.: Гафурбеков Т., Фольклорные истоки узбекского профессионального музыкального творчества, Т., 1984.

Тўхтасин Ғафурбеков.

---

Кирилл алифбосида мақола: ХАЛҚ КУЙЛАРИНИ ҚАЙТА ИШЛАШ ҳақида тўлиқ маълумот категорияси: X ҳарфи фикрингиз бўлса изоҳда қолдиринг ва дўстларингиз билан улашинг биз бундан минатдор бўламиз бизни кузатишни давом этинг (у ким, бу нима, қанақа ?, тушунчаси деган саволарга жавоб топишингиз мумкин)