AVTOMAT QUROL — oʻq otish quroli. U oʻq (snaryad) otilganda hosil boʻlgan porox gazining quvvati bilan oʻzoʻzidan oʻqlanib otilgani uchun shunday ataladi. U uzluksiz va yakka oʻq otish imkonini beradi. Faqat qayta oʻqlanishi avtomatlashgan qurol yarim Avtomat qurol deb ataladi. Avtomat qurol 19-a. 2-yarmida paydo boʻldi. Quyidagi turlarga boʻlinadi:
1) avtomat pistoletlar — yaqin masofa (50 m)ga oʻq otadigan qurollar;
2) pistolet-pulemyotlar — 300 m gacha masofadagi nishonga zarba beruvchi qurollar.
3) oʻzi oʻqlanuvchi va oʻzi otiluvchi avtomat miltiqlar — 600 m ga qadar masofadagi nishonga bittalab otish uchun moʻljallangan. Oʻq bittalab otilganda minutiga 25—30 oʻq otish mumkin;
4) qoʻl pulemyotlari — 800 m masofadagi nishonga otishga moʻljallangan qurollar. Bittalab minutiga 120 donaga qadar oʻq otish mumkin;
5) stanokli pulemyotlar —1000 m va undan uzoq, (2—2,5 km) masofadagi nishonga zarba berish uchun ishlatiladigan kuchli qurollar. Minutiga 250 ga qadar oʻqotadi. Stanokli pulemyotlar pastroq uchuvchi dushman samolyotlariga ham zarba bera oladi:
6) yirik kalibrli pulemyot (odatda, kalibri 12,7—15 mm) — tank va samolyotlarga oʻrnatiladigan qurol, havodagi nishonlarga zarba berish, yengil zirh bilan qoplangan nishonlarga qarshi kurashish uchun moʻljallangan qurol;
7) avtomat toʻp (kalibri 20 mm va undan katta) — asosan havodagi nishonlarga zarba berish uchun tank va samolyotlarga oʻrnatiladigan qurol.