ALI QUSHCHI

ALI QUSHCHI (taxallusi; asl ismi-sharifi Mavlono Alouddin Ali ibn Muhammad Qushchi Samarqandiy) (1403, Samarqand — 1474, Istanbul) — falakiyotshunos va riyoziyotchi olim, mutafakkir, Ulugʻbek ilmiy maktabining atoqli namoyandalaridan biri, uning yaqin shogirdi. Amir Temur qarorgohi boshligʻining oʻgʻli. Ulugʻbek saroyida qarchigʻaylar boqqani uchun uni «Qushchi» deyishgan. Ali Qushchi boshlangʻich maʼlumotni Samarqandda oladi (Qozizoda Rumiyda tahsil koʻradi), oʻz maʼlumotini oshirish uchun 1414-y. da Eronning Kirmon sh. ga boradi va u yerdagi madrasada 3 yil taʼlim oladi, ayniqsa tabiiy fanlarni, xususan falakiyot, riyoziyotni puxta oʻrganadi, 1417-y. Samarqandga kaytadi. Bu vaqtda Samarqandda Ulugʻbek madrasasi qurilayotgan edi. Ali Qushchi shu madrasada ham taʼlim olishni davom ettiradi, Qozizoda Rumiy va Gʻiyosiddin Koshiylardan ilm sirlarini oʻrganadi. Madrasani bitirgach, shu yerda falakiyot va riyoziyotdan mashgʻulotlar olib boradi, ilmiy ishlar bilan mashgʻul boʻladi. Ulugʻbek rasadxonasini qurish ishlarida ham faol qatnashadi. Shu davrda «Hisob risolasi» va «Astronomiya risolasi» asarlarini yozadi va ilm ahli orasida katta obroʻ kozonadi. 1428-y. Ulugʻbek rasadxonasi ishga tushirilgach, bu yerda Ulugʻbek rahbarligida kuzatuvlar olib boradi, risolalar yozishda davom etadi. Ulugʻbekning «Ziji jadidi Koʻragoniy» asari yozilishida Ali Qushchining ham hissasi katta. 1438-y. Ulugʻbek Ali Qushchini Xitoy saltanatiga elchi qilib yuboradi, u Xitoydan qaytib kelgach, «Matematika va astronomik jugʻrofiya» asarini yozadi.

Ulugʻbek vafotidan (1449) soʻng uning Samarqanddagi mashhur kutubxonasi xavf ostida qoladi. Kutubxonani Ali Qushchi saqlab qolgan degan taxminlar bor; rivoyatlarga qaraganda kutubxonadagi kitoblarning koʻp qismini A. Q. Samarqand yaqinidagi Xazrat Bashir qishlogʻiga koʻchirgan. Koʻp oʻtmay, taʼqiblardan qochib, A. Q. Samarqanddan chiqib ketishga majbur boʻladi. U avval Karmana va b. shaharlarda yashab, 1465-y. Turkiyaning Istanbul sh. ga boradi. Turk sultoni Muhammad II (1451—81) taraqqiyparvar shaxs boʻlib, oʻz atrofiga olim va shoirlarni toʻplar edi. Ali Qushchining dongʻini eshitgan sulton uni saroyga xizmatga taklif kiladi va olimlarga rahbar qilib tayinlaydi. A. Q. Turkiyada olimlar, faylasuflar, shoirlarni oʻz atrofiga toʻplab, ilmiy ishlarni taraqqiy ettirishga intiladi, oʻzi esa riyoziyot, falakiyot, falsafa, mantiq, adabiyot, musiqa va b. fan sohalaridan risolalar yozadi. Ali Qushchidan 20 dan ortiq ilmiy asar meros boʻlib qolgan. U koʻp olimlarning asarlariga sharhlar yozgan. Ayniqsa Ali Qushchining «Ulugʻbek zijiga sharh» asari astronomiya tarixida katta ahamiyatga ega. U «Zij»ni geometrik teoremalar yordamida sharhlaydi. Ali Qushchi asarlarining koʻpchiligi Turkiyadagi Ayo-Soʻfiyo madrasasi kutubxonasida saqlanib qolgan.

Ulugʻbek maktabi namoyandalari va xususan Ali Qushchining asarlari va dunyoqarashlari ilm-fan tarixida oʻziga xos oʻrin tutadi. Ali Qushchi dunyo moddiy narsalardan iborat, moddiy narsalar esa oddiy va murakkab holda boʻlib, ularda ichki ziddiyatlar mavjud, deb hisoblagan. U fasllar almashinuviga Yerning Quyoshga yaqinlashuvi sababligini aytgan.

Ali Qushchi 16 — 17-a. larda Oʻrta va Yaqin Sharq mamlakatlarida riyoziyot fani rivojiga sezilarli taʼsir koʻrsatgan. «Hisob risolasi» asaridan Oʻrta Osiyo madrasalarida oʻquv qoʻllanmasi sifatida foydalanilgan. Bu asarda hindlar arifmetikasi (oʻnlik sanoq tizimi), falakiyotshunoslar arifmetikasi (oltmishlik sanoqtizimi) va geom. (handasa) haqida yangi fikrlar aytilgan. «Kitob ul-Muhamadiya» asarida Ali Qushchi sonlardan ixtiyoriy natural darajali ildiz chiqarish usullarini va Nyuton binomi formulasini koʻrsatadi, uning bu usullari hoz. vaqtda Ruffini — Gorner sxemasi deb nom olgan usulga oʻxshashdir. Bu asarida Ali qushchi K,, kvadrat ildizini, umuman I darajali iddizni taqribiy hisoblash formulalarini beradi. Shuni taʼkidlash lozimki, hoz. ildiz ishorasi Turkiston olimlari asarlarida qoʻllanilmagan: ildiz soʻzlar bilan yozilgan. Ali Qushchi bu asarida birinchi boʻlib asoslagan «musbat» va «manfiy» atamalari, ularning tatbiqi mat. tarixida katta ahamiyatga ega. Gʻarbiy Yevropaga «musbat» va «manfiy» sonlar 15-a. oxirlarida pizalik Leonardo asarlari orqali tarqalgan. Kitobda uzunlik (masofa), kesmalar va yuzlarni oʻlchash va jismlarning hajmlarini hisoblash qoidalari bayon qilingan. Bu asarda trigonometriyadagi tekis uchburchaklar trigonometriyasi, sinus va kosinus teoremalari bayon etiladi, baʼzi shakllarning sirtlarini hisoblash uchun taqribiy formulalar beriladi, bu formulalar Ali Qushchidan oldin oʻtgan olimlar asarlarida uchramaydi. Kitobda keltirilgan sinuslar jadvalidagi sinus funksiyasining qiymatlari hoz. zamon qiymatlaridan deyarli farq qilmaydi.

Ali Qushchi uchburchakning yuzini topish usulini ham bergan. Hozirgi i. t. ishlari koʻrsatishicha, Ali Qushchi asarlaridagi toʻgʻri chiziqli trigonometriyaga doir koʻp masalalar birinchi marta berilgan ekan. Uchburchaklarni yechish masalasida konuslar teoremasini Koshiy va Ali Qushchi birinchi marta ish-latganlar (Yevropada 1593-y. birinchi marta Viyet tatbiq etgan). Ali Qushchi «Astronomiyaga oid risola» asarida Ulugʻbek rasadxonasida olib borilgan kuzatishlarning natijasi oʻlaroq, yulduzlar va sayyoralarning harakati, past (perigey), yuqori (apogey) masofalari haqidagi, fazoda har bir sayyoraning oʻrni, Quyosh uzoqligi haqidagi hisoblashlar va jadvallarni keltirgan, Oy va Quyosh tutilishi masalalarini ham juda aniq, toʻgʻri va ilmiy tarzda tushuntirib bergan. Yuqorida aytilgan «Astronomiya risolasi»da Ali Qushchi tuzgan dunyo xaritasi berilgan. Xaritada asosan shim. yarim shar chegaralari koʻrsatilgan; xaritadagi koʻndalang chiziqlar iqlimlar chegarasini ifodalaydi. Ekvatorning sharqiy yarim sharidagi uz. «3332 farsang» — taxm. 20 ming km ga toʻgʻri keladi. Xarita bir qadar sxematik tarzda tuzilganligiga, uning haqiqatga mos kelmaydigan joylari borligiga qaramay, u Oʻrta Osiyo xaritashunosligining bir na-munasi sifatida ahamiyatga ega. Ali Qushchi mat. fanidan oʻqish kitoblari va qoʻllanmalar ham yozgan. A. Q. Samarqand ilmiy maktabi anʼanalarini davom ettirib, bu ilmiy maktabning fan sohasidagi katta yutuqlarini Oʻrta, Yaqin Sharq va Yevropa mamlakatlariga tarqatishda faol ishtirok etadi. Ali Qushchi vafotidan soʻng uning shogirdlari — Mirim Chalabiy, Husayn Birjandiy, Bahovaddin Omuliy, Najmiddin Alixon va b. uning ilmiy ishlarini davom ettirdilar.

Ali Qushchi asarlari qoʻlyozmalari Toshkent Sharqshunoslik in-tida, Dushanba, Sankt-Peterburg, Mashhad, Istanbul, Oksford, Leyden (Niderlandiya) va AyaSoʻfiyo (Turkiya) kutubxonalari va b. joylarda saqlanmoqda.

As: Astronomiyaga oid risola, T., 1968; Ad.:Ahmedov B„ Ulugʻbek, T., 1965,Nosirov Ali qushchi, Ali Qushchi, T., 1964; Ahadova M., Oʻrta osiyolik mashhur olimlar va ularning matematikaga doir ishlari, T., 1983; Abdurahmonov A., Ulugʻbek akademiyasi, T., 1993.

Abdumannon Abdurahmonov.

---

Lotin alifbosida maqola: ALI QUSHCHI haqida to'liq ma'lumot kategoriyasi: A harfi fikringiz bo'lsa izohda qoldiring va do'stlaringiz bilan ulashing biz bundan minatdor bo'lamiz bizni kuzatishni davom eting (u kim, bu nima, qanaqa ?, tushunchasi, degan savolarga javob topishingiz mumkin)