ШАНБА (форс.) — Григорий календари бўйича ҳафтанинг жумадан кейинги, якшанбадан олдинги куни. Исломдан илгари арабларда Шанба дастлаб муқаддас кун саналган. Ислом динида жума ибодат ва дам олиш куни деб қабул қилингач, Шанба ҳафтанинг бошланиш куни бўлиб қолган. Бошқа кунлар шунга мувофиқ равишда номланган. Мас, якшанба — биринчи кун, душанба — иккинчи кун, сешанба — учинчи кун, чоршанба — тўртинчи кун, пайшанба — бешинчи кун.
Қадимги яҳудийлар анъанасида Шанба куни муқаддас кун ҳисобланади. Руслардаги суб«бота» сўзи яҳудийларнинг «шаббот» (диний байрам) сўзидан олинган.