ВИНИЛПИРИДИН КАУЧУКЛАР

ВИНИЛПИРИДИН КАУЧУКЛАР — синтетик каучуклар; диен углеводородларнинг винилпиридинлар ёки уларнинг ҳосилалари билан сополимерланишидан ҳосил бўлган маҳсулотлар. Винилпиридин каучукларда винилпиридин занжирининг миқдори одатда 30% дан ошмайди. Винилпиридин занжиридан ташқари, стирол, акрилонитрил, метакрил кислота занжирларига эга бўлган учламчи сополимерлар ҳам маълум. Винилпиридин каучуклар сувли эмульсияда мономерларни сополимерлаб олинади. Бензол, толуол, бензинда эрийди, 15% дан ортиқ винилпиридини бўлган каучуклар кетон ва мураккаб эфирларда эрийди. Пиридин гуруҳлари борлиги сабабли Винилпиридин каучуклар ионлаштирувчи нурлар таъсирига чидамли бўлади. Хлоранил иштирокида Винилпиридин каучуклардан олинган резина 200° гача т-рада мойлар, эритмалар, синтетик сурков мойлари таъсирига чидайди. Винилпиридин каучуклардан тайёрланган резина совуққа ўта чидамлилиги билан бутадиеннитрил каучуклардан тайёрланган резинадан фарқ қилади.

Винилпиридин каучуклар —50 дан 180° гача ҳароратда ишлатиладиган зичловчи резина шланглар тайёрлашда, шунингдек автомобиль шиналари, елим, мойга ва гидравлик суюқликларга чидамли резина маҳсулотлар и. ч. да қўлланилади.

---

Кирилл алифбосида мақола: ВИНИЛПИРИДИН КАУЧУКЛАР ҳақида тўлиқ маълумот категорияси: В ҳарфи фикрингиз бўлса изоҳда қолдиринг ва дўстларингиз билан улашинг биз бундан минатдор бўламиз бизни кузатишни давом этинг (у ким, бу нима, қанақа ?, тушунчаси деган саволарга жавоб топишингиз мумкин)