Adham Ochilov (1976-yil 7-aprelda tavallud topgan) — oʻzbek erkin kurashchisi, Osiyo chempioni, jahon chempionati sovrindori.
Adham Ochilov 1976-yilda Toshkent shahrida dunyoga keladi. U 1995-yilda Markaziy Osiyo oʻyinlarining kumush medalini qoʻlga kiritdi. Yosh boʻlishiga qaramay Adham 1996-yilda Osiyo chempioni boʻldi va jahon kubogi kumush medalini qoʻlga kiritishga muvaffaq boʻldi, ammo Atlantadagi Olimpiya oʻyinlarida u 7-oʻringa tushib qoldi. Erkin kurashchi yana oʻz ustida ishlab, tinimsiz mashq natijasida 1999-yili jahon chempionatining kumush medali, Osiyo chempionatining bronza medali sohibi boʻldi.
Ochilov 2000-yilda yana Osiyo chempionatining bronza medali sovrindori va Sidneydagi Olimpiya oʻyinlarida 8-oʻrinni egalladi. 2001-yilda esa jahon kubogi kumush medalini olishga erishdi. 2004-yilda u Osiyo chempioni, 2005-yilda jahon kubogi bronza medalini, 2007-yilda Adham jahon kubogi kumush medali va harbiylar oʻrtasidagi jahon kubogi bronza medalini oldi. 2008-yilda harbiylar oʻrtasida oʻtkazilgan jahon chempionatida gʻolib boʻlgan.