AXLOQ TUZATISH ISHLARI

AXLOQ TUZATISH ISHLARI — OʻzRda jinoiy jazo turi. Mahkumni axloqan tuzatish — unda qonunga itoatkor xulq-atvorni, inson, jamiyat va mehnatga, jamiyat turmushi qoidalari hamda anʼanalariga hurmatni shakllantirishdan iborat. Axloq tuzatish ishlari ish hakining 10% dan 30% gacha miqdorini davlat daromadi hisobiga ushlab qolgan holda shaxsni mehnatga majburan jalb qilishdan iborat. Axloq tuzatish ishlari faqat asosiy jazo sifatida 6 oydan 3 yilgacha, jinoyat sodir etish paytida 18 yoshga toʻlmaganlarga nisbatan esa bir oydan bir yilgacha muddatga tayinlanadi. Bu jazo ijtimoiy xavfi katta boʻlmagan jinoyat sodir qilgan shaxslarga nisbatan, ularni jamiyatdan ajratmasdan ham tarbiyalash mumkin boʻlgan taqdirda tayinlanadi, pensiya yoshiga yetgan, mehnatga qobiliyatsiz shaxslarga, homilador yoki yosh bolasini boqish uchun taʼtidda boʻlgan ayollarga va harbiy xizmatchilarga nisbatan qoʻllanilmaydi (OʻzR JK, 46 – va 83-modda). Qonunda Axloq tuzatish ishlarining ikki turi nazarda tutilgan boʻlib, bular jazoni mahkumning oʻz ish joyida oʻtashdan yoki jazo ijrosini nazorat qiluvchi organlar belgilab beradigan boshqa joyda oʻtashdan iborat. Sud shaxsga Axloq tuzatish ishlarini tayinlaganda jazo turini hukmda koʻrsatadi. Jinoyat-ijroiya kodeksida Axloq tuzatish ishlarini ijro etish tartibi (26-modda), ichki ishlar organlarining jazolarni ijro etish inspeksiyasining nazorat ishlari (27-modda) belgilangan. Mahkum ishlaydigan korxona, muassasa, tashkilot maʼmuriyatiga ham hukmni ijro etish borasida qonun bilan tegishli majburiyatlar yuklatilgan (28-modda).

Jazo muddatini hisoblash — mahkumning ish haqidan ushlab qolingan kundan, ish haqidan ushlab qolish — jazolarni ijro etish inspeksiyasidan xabarnoma olingan kundan, boshqa joyda oʻtaladigan Axloq tuzatish ishlariga hukm qilingan shaxslar uchun — jazoni oʻtash uchun yuborilgan korxona, muassasa, tashkilotda ish boshlagan kundan eʼtiboran boshlanadi. Mahkum ishlab bergan kunlar miqdori sud tomonidan belgilangan jazo muddatining har oyiga toʻgʻri keladigan ish kunlari miqdoridan kam boʻlmasligi shart (JIK, 30-modda).

Jazolarni ijro etish inspeksiyasi belgilaydigan joylarda jazoni oʻtash muddati mobaynida inspeksiya yozma ruxsatisiz, mahkum tashabbusi b-n mehnat shartnomasini bekor qilish taʼqiqlanadi. Jazo muddati uzluksiz boʻlgani uchun shu muddat davomida mahkumga mehnat taʼtili berilmaydi, ishlangan muddat umumiy va uzluksiz ish stajiga qoʻshib hisoblanmaydi.

---

Lotin alifbosida maqola: AXLOQ TUZATISH ISHLARI haqida to'liq ma'lumot kategoriyasi: A harfi fikringiz bo'lsa izohda qoldiring va do'stlaringiz bilan ulashing biz bundan minatdor bo'lamiz bizni kuzatishni davom eting (u kim, bu nima, qanaqa ?, tushunchasi, degan savolarga javob topishingiz mumkin)