ВИЗА

ВИЗА (франц. visa, лот. visis — кўздан кечирилган, қаралган) — 1) турли давлатлар фуқароларининг бошқа бирон-бир давлатга кириши, ундан чиқиши, қисқа муддат яшаши ёки давлат ҳудудидан ўтиши учун ҳукумат масъул органлари томонидан (мас., ташқи ишлар вазирлиги, ички ишлар вазирлиги) фуқаро паспортига қўйиладиган махсус расмий рухсат белгиси. Визалар оддий, туристик, хизмат ва дипломатик турларга бўлинади. Оддий Виза фуқароларга шахсан фойдаланиш учун, туристик Виза — уюшган ёки якка сайёҳларга, хизмат Визаси — давлат ва ҳукумат органларининг хизматчи шахсларига хизмат юзасидан, дипломатик Виза эса дипломатик мақомга эга бўлган масъул кишиларга берилади. Виза лардан бир ёки кўп марта фойдаланиш мумкин. Бир марта фойдаланиладиган Виза кўрсатилган муддат ичида Виза берувчи мамлакатга бир марта келиб-кетиш учун рухсатномадир. Кўп марта ишлатиладиган Виза кўрсатилган муддат ичида рухсат берган давлатга бир неча маротаба келиб-кетиш ҳуқуқини таъминлайди. Шунингдек, кўпгина мамлакатларда фуқаро паспортларига ўз мамлакатидан хорижий юртларга чиқиш учун рухсатнома — В. белгиси қўйилиши мумкин; 2) бирон ҳужжат устидаги ёзув — розилик белгиси; ҳужжатнинг ички келишувини ифодалайди. Амалиётда биронбир ҳужжатни тайёрлаган шахснинг бу ҳужжатга масъуллигини тасдиқловчи имзосини, шунингдек мансабдор шахснинг муайян ҳужжатдаги фикрга (илтимос ёки талабга) розилигини англатади.

---

Кирилл алифбосида мақола: ВИЗА ҳақида тўлиқ маълумот категорияси: В ҳарфи фикрингиз бўлса изоҳда қолдиринг ва дўстларингиз билан улашинг биз бундан минатдор бўламиз бизни кузатишни давом этинг (у ким, бу нима, қанақа ?, тушунчаси деган саволарга жавоб топишингиз мумкин)